Chemte thlawk thei kan nei

Kan naupan lai khan CHEMTE THLAWK THEI kan nei thin a. Kha kan chemte thlawk thei avang khan thiante zingah pawh kan lar hle a. Tin, hlauh pawh min hlauh phah a. Keimahni rual tawk ah khan kan chemte thlawk thei neih thu kha a lar em thin avangin kan khua ah kha chuan naupang zawng zawng khan min hre vek a ni ber mai.

Kan khaw mawng lam naupang 'Chhanala' chuan a pu Nawla'n Bittol(Pistol) a neih thu a sawi pawh kha a lar viau na a, khang hunlai naupang ho khan pistol te chu cowboy Sudden-a te ho thawnthu vang khan kan hre hlawm viau tawh a. Chuvang te pawh chu a ni mahna, Pu Nawla Bittol aia kan Chemte thlawk thei a lar zawk na chhan pawh chu.

A nia lawm, khang hunlai khan cowboy ho vanga Pistol te kan lo hriat ve hle hlu tawh a, in draw lai te kan mitthla a, naupang pawnto thlenga Sheriff lo nei ve thin khan, Chemte thlawk thei ber kher hi chu kan la hre ngailo a. Khang hunlai a kan neih bak kha kan khua ah phei chuan tun thleng hian nei an awm thawm sawi tur pawh a awm lo. Hmun dangah te hian lo nei ve khiah te chu an lo awm ve mahna.

Khang hunlai kha chuan Indian kan nih leh nihloh lam kan sawi vul ve lek luk lova, hnam a chian leh chian loh lam kan ngaihtuah ve ngai heklo. India kha kan tan em em ringawt mai thin a. Bom mitnei te, atom bomb te, jet fighter te kha India khan kan ngah hian kan han hre khawp a. Thingtlang kilkhawr, electrict pawh luh mumal loh na hmun atang khan USA te chu kan cho em em mai thin a. Indo pawh ni ila India chu kan chak chiang sa ah kan ngai a, kan lo in tithei ve em em thin a. Chutiang khawp a India ram kan ngaihsan ai aia nasa chuan kan khaw naupang ho chuan kan Chemte thlawk thei avang chuan min ngaisang zawk a ni.

India han sawi tak ah chuan India kha kan han tan na thei thin khawp a. Kan khua ah khan Burma lam atanga rawn pem thla, sikul rawn kal ve thin kha a awm a. Insual a hrat in a kawlh si a, kan class a kan mipa lian ber nen khan an in mil lo lutuk a, an insual reng mai thin a. Keini ho lah chuan an insual tawh chuan, "India leh Burma an in do ve," kan tia, kan au dur dur mai thin a. India kha chu tan vet vet tak kan ni. Tun lai ah Indian ka ni lo tih vel kha kan nei ve lova, Indian kan ni e tih pawh a awm chuang lova. India kha kan tan em em ve tawp mai thin a ni. Ram leh hnam ah kan la chiang phak velo te pawh a ni mahna!! Nge kan lo chiang zawk daih?

Kan chemte thlawk thei kha a tha mai mai khawp a, khang hunlai ah kha chuan silai ai pawhin a tha in a hlauhawm daih zawk tih kha naupang ho zawng zawng khan an hre vek. A chhan chu kan hmanraw tha neih te kha lar tir kan duh a, midang htiattir kan duh chuan a thatna zawng zawng bakah dawt tlem belh a fak chawp kha a ngai thin tlat a ni. Khang hunlai naupang zawng zawng chuan khatiang a dawt tlem belh kha kan ching vek. Tumah in dem thei pawh kan awm lo. Engemaw chang phei chuan dawt sawi thiam apiang kan ngaihsan hunlai te pawh kha a awm a nia.

Kan chemte thlawk thei khan huhang a ngah bawk a a hmel la hmu miahlo pawh khan an hlau em em mai a. In tih thiamloh nikhua pawhin chemte thlawk thei kan sawi chhuah zeuh chuan bawkkhup in chibai min buk lo chauh zel a nih kha. A lar avang khan kan roh em em bawk a, mi nazawng en pawh kan phal lo. En kan phal sak te pawh kha an khawih chhin kan phal lova, an en chiah kan phalsak thin.

En tur pawh khan man chawi a ngai a. A man pawh kha a sang larh mai. India tangka khan kan nunah awmzia a nei lova. Siki a sweet mum tam tak kan lei theih hunlai kha a ni a. Pawisa kha keini tan chuan engmah a ni lo. Nei teuh pawh ni ila society dawr a sweet mum sen, lian bel bul lei nan bak hman na tur kan hre chuanglo. Khatiang taka pawisa kan mamawh loh avang khan kan chemte thlawk thei en manah chuan tui thak (meat masala rim nam ngat) te, sephung te, tangtial te, thlangdar te kha en manah kan la thin. Keini tan chuan pawisa aia hlu zawk a ni tlat. Thenkhat chuan chhuat min nawh sak te, tui min chawi sak te, school atanga kan in thleng a min puak haw te khan an en hlawh bawk. Kan venga naupang huai ber erawh chuan buaina ka neih apiang a ka ai awh a rawn inpe in ka en tir ta a. Ka bodyguard ah a tang nghal bawk.

Pakhat in a en chhin tawh kha chuan kan sawi bak tlem phuah belh in midang bul ah khan an sawi chhawng leh a. A la en ve lo te phei chuan en an chak em em thin. Keini lah chuan kan roh em em a, en duh an awm a, en man an neih pawhin kan en tir phal lawklo thin a. Chu chuan a ti hlu em em thin. Tin, a en tawh te pawhin a hnu lama en ten an sawi dan a danglam zel avangin en nawn leh an chak a, chuvang chuan vawi khat mai duh tawk lovin an en nawn fo thin. Chuvang chuan tlawn pawh kan hlawh a, a rei deuh hnu phei chuan a free a en thei chin kan siam a. A free a en duh kha an tam khawp a, hna thawk ah khan kan chhawr ngheng zel mai thin a.

Umn... a thui lutuk palh ange. He kan chemte thlawk thei hi Japan ral len laia ka pu (ka pa pu) rawn hawn a ni a. Kan chem hmuh thin pangai ho nen a inan loh avang hian a dangdai hle a. Chemte thlawk thei tih pawh hi awm ve tak a ni. Chu kan chemte thlawk thei chu ka pu atanga in rochung chhawng zel kan ni a. Chu chem chu Vai ho KHUKRI hi a ni e.