Home » » HTML zir ang

HTML zir ang

Tun tum chu HTML hi i zir ho ang u aw. Thenkhat chu hetiang lama tui vaklo in awm mai thei a, mahse in lo chhiar ve hram hram a ni ang chu.

HTML tih lampum chu Hyper Text Markup Language tih a ni a. A hman na ber chu website design nan a ni. Website design na hrang hrang PHP, Java Script, asp etc te awm nual tawh mah se HTML pawimawhna leh tangkaina hi a nep tak tak thei chuanglo a. Heng language dang hmanga design ho pawh hi HTML a in let chhuak lehin kan browser ah a nih tur anga rawn tarlan leh thin a ni.

Hetiang lam chu sawi thui lo mai ang. HTML chu zir tan mai ang aw. HTML hmanga website kan design dawn chuan a code ziah a ngai a. Chumi code ziah nan chuan software hman ngai a awm ve a. Chu chu lei emaw, download chawp emaw ngai lovin kan computer ah a awmsa mai a. Thu chhutna atana kan hman thin mawlmang tak Notepad emaw, wordpad emaw kha hman mai tur a ni.

HTML code ziak tur chuan a hmasa ber a kan hriat tur pawimawh em em a awm a. Chu chu < leh > hi a ni. Code kan ziah reng reng chu < leh > inkar ah hian kan khung vek tur a ni. A khawi emaw zawk zawk pawh hi lo ziah hmaih ila, kan code kha a diklo duai dawn a, a hnathawh tur ang a thawk thei thin lo a ni. Tin, HTML hmanga kan code ziah te hi kan duhtawk chinah kan close leh ngei ngei tur a ni a. Code pakhat pawh i close kim lo a nih chuan a diklo duai dawn a. A close nan hian < leh > inkar ah hian / kan dah thin.

HTML code reng reng chu <HTML> leh </HTML> inkar ah ziah vek tur a ni a. He code pahnih hi a bul tan nan leh a tawp khar nan a hman thin a ni. Hetiang hian HTML hmanga code kan ziah dawn chuan kan ziak ang:-
<HTML>
</HTML>

HTML ah hian code ziah nan hian Capital leh small letter a hman theih ve ve a. Chuvang chuan buai loh tur a ni. Awle, HTML bul kan tan ta a. HTML kan open a, a close na kan ziak tawh bawk a. A dawt leh ah chuan a head kan siam ang. Hemi section hi website a lang tel tur a ni lova, website cheina tur CSS link leh thildang pawimawh dah khawm nan hman a ni thin. A awlsam zawng in sawi ta mai ila, kan website title te leh thil pawimawh dang dah nan kan hmang thin.

Awle, tunah chuan <HEAD> code hi kan dahlut ve leh tawh anga, a hnuai ami ang hian tih leh mai tur a ni:-
<HTML>
<HEAD>
</HEAD>
</HTML>

A chunga code hi en ta ila, Head khi kan open avangin kan close leh a ngai a. </HEAD> tih khi a close na chu a ni ta a. Khitiang a kan close loh chuan nakin ah kan code ziah leh tur dang kha a ti buai vek thei dawn a. Chuvang chuan code eng chi pawh kan open chuan kan duhtawk kan tih zawh ah kan close leh ngei ngei tur a ni.

Kan hriat reng tur chu HTML hmanga notepad emaw wordpad emaw a kan code ziah chu kan save hunah text file anga save loh tur a ni a, html tih dah tel tur a ni. Tuna kan ziah chin khi han ziak ve la, test.html emaw test.htm tiin emaw save la. I file chu han open teh le. I browser khan a rawn tilang tawh anga, engmah kan la ziahluh loh avangin a blank tawp in a lang rih ang. I file save chu i edit duh a nih chuan right click a, open with ah khan notepad kha select leh mai tur a ni. Internet explorer i hmang a nih chuan View tih ah khan click la, Source tih kha select la, notepad in a rawn in hawng anga, khata tang khan i edit mai thei bawk ang.

9 comments:

  1. A tha hle mai. HTML code vel hi internet atangin theihtawpin ka zir thin a, hetianga Mizo tawng ngeia fiah taka i rawn ziak hi a lawmawm khawp mai. La rawn chhunzawm zel la a tha ang.

    ReplyDelete
  2. A va tangkai hmel ve. Mahse hetiang lampang hi ka hrethiam ve tak tak dawn lo anih ka ring.

    ReplyDelete
  3. @ts, la rawn chhunzawm zel ka tum. @pu cari, ngaihven zawng a nih vak lemloh phei chuan hriatthiam a har alawm.

    ReplyDelete
  4. post dangah ka zawhna chu i hmuhlo nge a chhanna ka hmulo a hetah ka rawn post leh ange inthlahrung awm viau mahse :)

    paisalive leh magicptr kha i la hmang em? a rintlak leh tlaklo ka hre duh, plsss??

    ReplyDelete
  5. @awmlo, ka rawn chhan tawh saw i la hmu fuhlo mai mai a ni ang.

    ReplyDelete
  6. Ka lawm lutuk e, post pahnih ah ka lo post a min chhanlo na zawk kha ka lo chek vang a ni e sorry>. I reference na hnuaiah ka awm keuh a nia hehe

    ReplyDelete
  7. Attributes leh a dang te pawh han thawh ta law law la...

    ReplyDelete
  8. @MARUATA, attributes ho chu post dang a chhuah ah ka la khek deuh rih a.

    ReplyDelete

Online

Site Statistics

LATEST COMMENTS